وهج المشاعر يا ناس البرج العالى سلام عفاف الامين
وهج المشاعر يا ناس البرج العالى سلام عفاف الامين
وهج المشاعر
يا ناس البرج العالى سلام
عفاف الامين
يا ناس فوق انتوا حاسين بينا ؟؟؟
ولا هواء الاسبلت ضاربكم ومرطب عليكم ..قادرين تتخيلو نحن الناس التحت عايشين كيف ؟؟؟
الله لا وراكم لكن انتوا تحسو بينا كيف وطاقتكم الشمسية فل وبنزينكم فى عرباتكم فل…وتلاجاتكم شغالة فل..وغازكم مليان فل مخازنكم دقيق وسكر ولبن ورز وعدس فل فريزراتكم لحوم فل
نومكم فل لا ضبان يصحيكم ولا بعوض وناموس يقرصكم
تلفونانكم مشحونة فل ما حاسداكم ربنا يزيدكم بس حسو بالمواطن الغلبان ..التعبان
حاولو يوم انزلو من برجكم العالى واتعايشو معانا حبة يمكن تجربو احساسنا ويعجبكم ..فى كليات الدراما والفنون عشان تكون ممثل شاطر لازم تعيش الدو ر ممثل مجنون تمشى مستشفى المجانيين كم يوم وتخش فى مود حياتم
ممثل شحاد تلبس مقطع وتكون لا فاطر لا متغدى وتعيش كم يوم معاهم . دورك ست ظار تمشى تعيشى مع ناس الظار وتفتحى علبة وتعملى كل الطقوس المطلوبة منهم
هسة انتوا تعالو عيشو معانا تفاصيل يومنا كهربا قاطعة ١٠ ساعات تلفونك يكون خطين توطى الاضاءة وتقفل البيانات وتقفل التلفون عشان يتم اليوم
موية حارة اصلا تلاجة مافى والتلج اللوح بعشرين الف
نوم مافى عشان الضبان والبعوض والقراص مشاركك اى حتة فيك
سخانة الف لا تعرف تقعد جوة لا برا
لو جازفت انبوبة غاز ب ١١٠ الف محرم تطبخ فيها فول لانو بكمل الغاز
ممنوع الكوارع بتنتهى من الغاز
ممنوع العجالى قوية مابتنجض بسرعة مسموح بس تعمل عدس وشاى عشان تكمل معاك ٢٥ يوم
جربت تجيك ملاريا وما عندك حق الحقن ؟؟ يلا تقضيها عرديب وحلبة وقشر قريب فروت مغلى ومحريب وقرض لما تقلب معاك ضنك
تقوم تغير الروتين لى بندول وقرع ودمرنى وفى الحالة يا دمرتها يا دمرتك
يا ناس البرج العاجى جربتو تعملو حلة عدس واليوم التانى تبوظ عشان الحر والكهربا قاطعة ؟؟؟
طيب ما تنزلو شوية وتتعايشو معانا وتحسو بينا
يمكن القى الزى فيكم
حسنو الخدمات للمواطن
قلتو جبتو اسبيرات جديدة للكهربا وبرضو قطع وبرمجة وخرمجة
وين عربات الرش بالمبيدات للبعوض والضبان ؟
الغاز خفضتو سعروا اختفى نهائ من المحلات
لك الله يا وطنى
